Хэрэглэх арга, тун:

Хэрэв өөрөөр заагаагүй бол дараах тунгаар хэрэглэхийг зөвлөнө.

Насанд хүрэгсэд болон 14-с дээш насны өсвөр насныхан: 1 уут бэлдмэлийг хоногт 1 удаа (хоногт 600мг ацетилцистеин) хэрэглэнэ.

АЦЦ бэлдмэлийн үйлдлийг зохих ёсоор гаргахын тулд эм хэрэглэх зааврыг нарийн баримтална.

Хэрэглэх арга:

Хоолны дараа халуун ундаа хэлбэрээр ууж хэрэглэнэ.

АЦЦ 600мг бэлдмэлийг аяганы талаас багагүй хэмжээний хүйтэн усанд хийж уусгаад дараа нь халуун ус (гэхдээ буцлам биш) аягыг дүүртэл нь нэмнэ. Уусмалыг хутгах ба уусмалын хэм уухад тохиромжтой болох үед  ууж хэрэглэнэ.

Хүйтэн усыг халуун устай холихыг (эсрэгээрээ биш) анхаарах хэрэгтэй.

Бэлтгэсэн уусмалыг бэлтгэсний дараа шууд ууна.

Шингэн нэмж хэрэглэснээр бэлдмэлийн цэр шингэлэх үйлдлийг нь ихэсгэдэг.

Үргэлжлэх хугацаа:

Эмчилгээний үргэлжлэх хугацаа нь  өвчний явц болон хэлбэрээс хамаарна.

Богино хугацааны ханиад шуухинааны үед 5-7 хоног үргэлжилнэ.

Архаг явцтай бронхит болон муковисцидозын үед ээлж эмчилгээ илүү удаан хугацаагаар үргэлжилнэ. Эмчилгээний үргэлжлэх дээд хугацаа 3-6 сар байна.

Бэлдмэлийг хэрэглэлгүй мартаж өнгөрөөх:

Хэрэв та бэлдмэлийн 1 удаагийн хэрэглээг  мартаж өнгөрөөсөн буюу эсвэл маш бага тунгаар хэрэглэсэн бол дараагийн тунг хэрэглэх хугацааг хүлээх ба тунгийн зөвлөмжийн дагуу бэлдмэлийг үргэлжлүүлэн хэрэглэнэ.

Хэрэглэх заалт:

АЦЦ нь өтгөн цэрийг шингэрүүлж түүнийг амьсгалын замаас ялгарахыг нь нөхцөлдүүлдэг цэр шингэлэх эм.

АЦЦ бэлдмэлийг ялгарахад бэрхшээлтэй болон өтгөн цэр дагалдсан амьсгалын замын цочмог ба архаг өвчний эмчилгээнд хэрэглэнэ. Үүнд цочмог ба архаг бронхит,  бөглөрөлт бронхит, бронхиолит, бронхоэктаз, уушгины үрэвсэл, ларингит, трахеит, бронхын багтраа, муковисцидоз, синусит, дунд чихний үрэвсэл орно.

Цээрлэлт:

Ацетилцистеин болон бэлдмэлийн найрлага дахь ямар нэгэн туслах бодист харшилтай хүмүүс

Идэвхтэй идэгдмэл шархлаа

Бэлдмэлийн найрлага дахь ацетилцистеины агууламж өндөр байдаг тул түүнийг 14-с доош насны хүүхдийн эмчилгээнд хэрэглэхгүй.

25°С-аас доош хэмд хүүхэд хүрэхээргүй газар хадгална.

Онцгой анхааруулга ба болгоомжлол:

Бронхын багтраатай болон шархлааны өгүүлэмжтэй өвчтөн уг бэлдмэлийн эмчилгээний үед болгоомжлох хэрэгтэй.

АЦЦ бэлдмэлийг хэрэглэх үед ялангуяа эмчилгээний эхэнд бронхын шүүрлийг шингэлж түүний эзлэхүүнийг ихэсгэдэг. Хэрэв ховхрох боломжгүй байвал (хангалтгүй ховхрох) тохирсон арга хэмжээ (гуурс тавих, соруулах гэх мэт) авах хэрэгтэй.

Ацетилцистеиныг хэрэглэх үед маш ховор тохиолдолд Стивенс-Джонсоны хам шинж, Лайеллын хам шинж зэрэг хүнд явцтай арьсны урвал илэрдэг. Арьс ба салст бүрхүүлийн зүгээс өөрчлөлт илэрсэн үед АЦЦ-г хэрэглэхээ зогсоож яаралтай эмчид хандана.

Чихрийн шижинтэй өвчтөнд зориулсан мэдээлэл: 1 уут АЦЦ 600мг бэлдмэл нь 2,1г сахароз агуулдаг.

Фруктозын үл зохицол, глюкоз-галактозын шингээлтийн алдагдлын хам шинж, сахараз-изомальтазын дутагдал зэрэг ховор тохиолддог удамшлын өөрчлөлттэй өвчтөнд уг бэлдмэлийг хэрэглэхгүй.

Жирэмсэн болон хөхүүл үеийн хэрэглээ:

Ацетилцистеиныг жирэмсэн эмэгтэйд хэрэглэсэн талаар мэдээлэл хангалтгүй байдаг. Ацетилцистеин хөхний сүүнд нэвтэрдэг талаар мэдээлэл байдаггүй.

Жирэмсэн болон хөхүүл үед  бэлдмэлийг зөвхөн эмчилгээний ашигтай тал болон эрсдлийг маш нарийн харьцуулж үнэлсний дараа хэрэглэж болно.