Атенолол-Денк 50 бэлдмэлийг яаж хэрэглэх вэ?

Атенолол-Денк 50 бэлдмэлийг үргэлж эмчийн зааврыг чанд дагаж хэрэглэнэ. Хэрэв ойлгомжгүй зүйл байвал эмчлэгч эмч болон эм зүйчээс асууж нягтална. Бэлдмэлийг ууж хэрэглэнэ.

Хэрэв эмч өөрөөр зөвлөөгүй бол бэлдмэлийг хэрэглэх ердийн тун:

Зүрх-цусны эргэлтийн үйл ажиллагааны эмгэг (зүрхний гиперкинетик хамшинж, зохицуулгын гипертоник эмгэг): Атенолол-Денк 50 бэлдмэлийг ½ нимгэн бүрхүүлтэй шахмалыг өдөрт нэг удаа (25 мг атенололтой дүйцнэ) хэрэглэнэ.

Зүрх судасны эмгэг (зүрхний архаг тогтвортой бах эсвэл зүрхний тогтворгүй бах): Атенолол-Денк 50 бэлдмэлийн 1-2 ширхэг нимгэн бүрхүүлтэй шахмалыг өдөрт нэг удаа (50-100 мг атенололтой дүйцнэ) хэрэглэнэ.

Зүрхний цохилт олширсон хэм алдагдал (ховдлын дээрх ба ховдлын хэм алдагдал): 1 шахмалаар өдөрт 1-2 удаа эсвэл 2 шахмалаар өдөрт 1 удаа (50-100 мг эсвэл 100 мг атенололтой тэнцүү) хэрэглэнэ.

Цусны даралт ихсэх эмгэг: эмчилгээг Атенолол-Денк 50 бэлдмэлийн 1нимгэн бүрхүүлтэй шахмалыг өдөрт нэг удаа (50 мг атенололтой тэнцүү) хэрэглэж эхэлнэ.

Хэрэв тунг нэмэх шаардлагатай бол нэг долоо хоногийн дараа 2 ширхэг нимгэн бүрхүүлтэй шахмалаар өдөрт нэг удаа (100 мг атенололтой дүйцнэ) хэрэглэнэ.

Хэрэв зүрхний цохилтын давтамж ба цусны даралт эмчилгээ шаардагдах түвшинд хүртэл буурвал эсвэл бусад хүндрэл илэрвэл Атенолол-Денк 50 бэлдмэлийн эмчилгээг нэн даруй зогсооно.

Тэмдэглэл:бөөрний үйл ажиллагаа дарангуйлагдсан өвчтөнд бэлдмэлийн тунг бөөрний клиренстэй хамт нэг шугаманд тохируулна. Креатинины клиренс 1 минутад 10-30мл (сийвэнгийн креатинин >1.2 < 5 мг/дл) хүртэл буурсан тохиолдолд тунг хагас тунгаар, 1 минутад 10 мл-с бага (сийвэнгийн креатинин >5 мг/дл) болсон тохиолдолд стандарт тунг ¼ хүртэл тус тус бууруулна.

Хэрэглэх арга:

Шахмалыг хооллохоос өмнө хангалттай хэмжээний шингэнээр даруулан (нэг аяга ус гэх мэт) залгиж ууна. 

Хэрэглэх заалт:

Зүрх - цусны эргэлтийн үйл ажиллагааны эмгэг (зүрхний гиперкинетик хамшинж, зохицуулгын гипертоник эмгэг)

Зүрх судасны эмгэг (зүрхний архаг явцтай тогтвортой бах ба зүрхний цохилт эсвэл цусны даралт ихэссэн зүрхний тогтворгүй бах)

Зүрхний цохилт олширсон зүрхний хэмнэл алдагдал

Ховдлын дээрх хэм алдагдал, тиреотоксикозоос шалтгаалсан синусын тахикарди, пароксизмаль ховдлын дээрх тахикарди, тосгуурын фибрилляц ба трепетани (зүрхний гликозидын өндөр тунт эмчилгээнд үр дүнтэй хянагдахгүй байгаа үед)-н тохиолдолд нэмэлт эмчилгээнд.

Ховдлын хэм алдагдал. Үүнд симпатик мэдрэлийн системийн идэвх ихэссэнээс үүссэн (бие махбодийн ачаалал, мэдээгүйжүүлэлтийн оршил үе, галотаны мэдээгүйжүүлэлт, симпатик мэдрэлийг идэвхжүүлэгч бэлдмэл хэрэглэх) ховдлын экстрасистол, ховдлын тахикарди ба ховдлын фибрилляци (зөвхөн урьдчилан сэргийлэх зорилгоор, ялангуяа симпатик мэдрэлийн идэвхжил ихэссэнээс үүссэн ховдлын хэм алдагдлын үед)

Цусны даралт ихсэлт (артерийн гипертони)

25°С-с доош хэмд хадгална. Уг савлалтын хүчинтэй хугацаа блистерийн хэсэг болон эвхэгддэг хайрцган дээр хэвлэгдсэн байна.

Хүчинтэй хугацаа дууссанаас хойш бэлдмэлийг хэрэглэхгүй. Хүүхэд үзэж хүрэхээргүй газар хадгална.

Дараах тохиолдолд Атенолол-Денк 50 бэлдмэлийг зөвхөн онцгой нөхцөлд эсвэл онцгой болгоомжтой хэрэглэнэ. Эмчтэйгээ зөвлөөрэй. Хэрэв танд урьд өмнө дараах тохиолдлын аль нэг нь илэрч байсан бол үүнийг мөн дагаж мөрдөнө.

Бэлдмэлийг дараах тохиолдолд зөвхөн эмчилгээний ашигтай үр нөлөө ба гарч болох эрсдлийг сайтар тооцож үзсэний дараа хэрэглэж болно.

Тосгуур ховдлын дамжуулах тогтолцооны хөнгөн зэргийн алдагдал (зүрхний хоригийн 1-р зэрэг)

Цусан дахь глюкозын хэмжээний хүчтэй хэлбэлзэл бүхий чихрийн шижинтэй хүмүүс (цусан дахь глюкозын хэмжээ хүнд хэлбэрээр багасах боломжтой байдал)

Удаан хугацаанд өлөн байх ба биеийн хүчний хэт их ачаалал (цусан дахь глюкозын хэмжээ хүнд хэлбэрээр багасах боломжтой байдал)

Бөөрний дээд булчирхайн тархилаг давхаргын даавар ялгаруулагч хавдраар шаналж буй хүмүүс (феохромоцитома; өмнө нь эмчилгээнд альфа рецепторт хориг үүсгэдэг бэлдмэл хэрэглэдэгбайсан)

Бөөрний үйл ажиллагааны алдагдалтай өвчтөн (хэрэглэх тун хэсгээс харна уу)

Бета рецепторт хориг үүсгэдэг бэлдмэлийг хайрст үлд эмгэгээр өвдөж байгаа, урьд нь өвдөж байсан өгүүлэмжтэй болон гэр бүлийн өгүүлэмжтэй хүнд зөвхөн эмчилгээний ашигтай үр нөлөө ба гарч болох эрсдлийг сайтар тооцсоны дараа хэрэглэж болно.

Бета рецепторт хориг үүсгэдэг бэлдмэлүүд нь харшилд мэдрэг байдал болон анафилаксын урвалын хүндрэлийг нэмэгдүүлдэг. Хүнд хэлбэрийн хэт мэдрэгшлийн урвал илэрч байсан өгүүлэмжтэй болон харшлын урвалыг бууруулах эсвэл устгах эмчилгээ хийлгэж байгаа (мэдрэггүйжүүлэх эмчилгээ) өвчтөнг сайтар ажиглах заалттай. (анхааруулга: анафилаксын урвалын хүч нэмэгдэж болзошгүй).

Чихрийн шижинтэй өвчтөнд цусан дахь глюкозын хэмжээ багасалтын (гипогликеми) анхааруулах  шинж, ялангуяа зүрхний цохилт олшрох (тахикарди), хуруу чичрэх (салганах) шинж тэмдэг далд явагдаж болох тул цусан дахь глюкозын хэмжээг тогтмол шинжлэх шаардлагатай.

Харааны линз зүүгч нулимс ялгаралтыг багасгаж болзошгүй гэдгийг анхаарна.

Хүнд хэлбэрийн бөөрний үйл ажиллагааны алдагдалтай өвчтөнд атенолол хэрэглэж байгаа үед бөөрний үйл ажиллагааг хянана. Учир нь бусад бета адренорецепторт хориг үүсгэдэг бэлдмэлийн эмчилгээнд эдгээр өвчтөний бөөрний үйл ажиллагаа улам муудсан шинж тэмдэг ажиглагдсан.

Хэрэв Атенолол-Денк 50 бэлдмэлийг хэрэглэж байгаа бол элэгний үйл ажиллагааг тогтмол хянана. Учир нь бусад бета адренорецепторт хориг үүсгэдэг бэлдмэлийн эмчилгээнд элэгний үйл ажиллагааны алдагдал илэрсэн байна.

Бусад бета адренорецепторт хориг үүсгэдэг бэлдмэлийн эмчилгээний үед цусны тромбоцитын цөөрөлт болон цөөрөлтгүй арьс ба салст бүрхүүл дээр жижиг цусархаг толбон тууралт илэрсэн. Иймээс Атенолол-Денк 50 бэлдмэлийг хэрэглэж байгаа үед ийм шинж тэмдэгт илэрч буй эсэхэд анхаарлаа хандуулах хэрэгтэй.

Атенолол-Денк 50 бэлдмэлийг верапамил ба дилтиаземын бүлгийн кальцийн сувгийг хориглогч бэлдмэл болон хэм алдагдлын эсрэг бусад бэлдмэлтэй (дизопирамид гэх мэт) хамт хэрэглэж байгаа тохиолдолд өвчтөнг анхааралтай хянана. Учир нь хүнд хэлбэрийн цусны даралт багасалт (гипотензи), зүрхний цохилт хүнд хэлбэрээр цөөрөх (брадикарди) болон бусад хэм алдагдал илэрч болзошгүй.

Хэрэв клонидиныг Атенолол-Денк 50 бэлдмэлтэй хамт хэрэглэж байгаа өвчтөнд гэнэт зогсоовол цусны даралт хэт ихсэж болно. Иймээс клонидиныг зөвхөн Атенолол-Денк 50 бэлдмэлийн эмчилгээг дууссанаас хойш хэдэн өдрийн дараа зогсооно. Клонидиныг аажим зогсооно.