Хэрэглэх арга, тун

Хэрэглэх тун, аргыг өвчний хүндрэл, цусны эргэлтийн алдагдал, бэдмэлийн хувийн тохироо зэргийг харгалзан эмч тодорхойлно.

Ердийн тун нь өдөрт 1-2 удаа (өглөө ба өдөр) 100мг (5мл-ийн 1 туншил) -300мг (5мл-ийн 3 туншил) пентоксифиллин тарих ба 250-500 мл шингэнээр (0,9%-ийн натрийн хлоридын уусмал, Рингерийн уусмал, 5%-ийн глюкозын уусмал) шингэлж венийн судсанд тарина. Тарих хурд – 100 мг пентоксифиллин (1 туншил/цаг).

Венийн судсанд тарьж хэрэглэхээс гадна петоксифиллиныг ууж хэрэглэж болох ч хоногийн тун 1200 мг-с илүү байж болохгүй.

Дагалдах өвчнөөс (зүрхний дутагдал) хамаарч шингэний эзэлхүүнийг бууруулах шаардлагатай бол зориулалтын дуслын аппарат ашиглана.

Бөөрний дутагдалтай өвчтөнд (КК 30 мл/мин-с бага) бэлдмэлийн хувийн тохиромжийг харгалзан тунг 50-70% зайлшгүй бууруулна. 

Элэгний хүнд дутагдалтай өвчтөнд бэлдмэлийн хувийн тохиромжийг харгалзан тунг бууруулах шаардлагатай.

Артерийн даралт багатай  даралт буурах эрсдэлтэй өвчтөнд (зүрхний хүнд хэлбэрийн шигдээс, тархины судасны нарийсал) эмчилгээг бага тунгаар эхлүүлээд аажим нэмэгдүүлнэ.

Өндөр настанд бэлдмэлийн тунг бууруулах ба артерийн даралтыг хянахыг зөвлөж байна. Ялангуяа артерийн даралт бууруулах болон судас өргөсгөх бэлдмэлтэй хамт хэрэглэж буй үед артерийн даралтыг хянах шаардлагатай.

Хүүхэд, өсвөр насныханд пентоксифиллин хэрэглэсэн  туршлага байхгүй.

Хэрэглэх заалт

Фонтейны ангилалаар IIb үеийн захын цусны эргэлтийн алдагдал: эмчилгээ эхлэх үед болон барих эмчилгээний үед пентоксифиллиныг ууж хэрэглэх ба мэс засал эмчилгээтэй хавсрах болон мэс заслын өмнө, эсвэл мэс засал хийх боломжгүй үед; чихрийн шижингийн ангиопати.

Артери, венийн судас бөглөрснөөс шалтгаалсан тэжээлийн алдагдал (жишээ нь: голены шарх ба гангрен).

Атеросклерозын шалтгаант тархины цусан хангамжийн алдагдлын өвчин.

Дотор чихний судасны эмгэгээс үүдсэн бүтцийн өөрчлөлтөөс сонсгол буурах (дүлийрэх г.м), нүдний судаслаг бүрхүүл ба торлогийн цусан хангамжийн алдагдал.

Хориглох заалт

Зүрхний цочмог шигдээс

Их хэмжээний цус алдалт

Тархины цус алдалт

Нүдний торлогт их хэмжээгээр цус алдах

Цусархаг диатез

Ходоод ба гэдэсний шарх

Жирэмсэн үед

Хөхүүл үед

18 хүртлэх насны хүүхэд

Пентоксифиллин болон метилксантины бусад уламжлал, бэлдмэлийн бусад найрлагад мэдрэг бол хэрэглэхгүй.

25°С-аас дээшгүй хэмд, нарны гэрлээс хамгаана.

Хүүхэд  хүрэхээргүй газар хадгална.

Болгоомжлол

Дараах өвчтөнүүдэд эмийн бэлдмэлийг болгоомжтой хэрэглэнэ. Үүнд: артерийн даралт ихтэй (артерийн даралт буурах эрсдэлтэй), бөөрний үйл ажиллагааны алдагдалтай (креатинины клиренс (КК) 30мл/мин-аас бага), элэгний үйл ажиллагааны хүнд хэлбэрийн алдагдалтай (эмийн бэлдмэл биед ихээр хуримтлагдаж гаж нөлөө үүсэх эрсдэлтэй), цус алдах эрсдэл бүхий хүмүүс ялангуяа антикоагулянт хэрэглэсэн, цус бүлэгнэлтийн системийн алдагдалтай (цус алдалт үүсэх эрсдэлтэй).

Эмчилгээний явцад артерийн даралтыг хянах шаардлагатай.

Цусан дахь сахар бууруулах бэлдмэл хэрэглэдэг чихрийн шижинтэй өвчтөнд тун ихэдсэн үед гипогликеми үүсч болзошгүй(тунг тохируулах шаардлагатай).

Антикоагулянттай хамт хэрэглэхэд цус бүлэгнэлтийн системыг анхааралтай хянана.

Ойрын хугацаанд мэс засал хийлгэсэн өвчтөнд  гемоглобины ба гематокритын түвшинг системтэйгээр хянана.

Өндөр настанд бэдмэлийн тунг бууруулах шаардлагатай (ялгарах хурд удааширна).

Пентоксифиллиныг хүүхдэд хэрэглэхэд аюулгүй, үр дүнтэй гэдэг нь бүрэн судлагдаагүй.

Тамхи татах нь бэлдмэлийн эмчилгээний үр дүнг бууруулна.

Пентоксифиллины тарилгын шингэнтэй нийцлийг нь тухай бүрт нь хянах шаардлагатай.

Бэлдмэлийг венийн судсанд тарих үед өвчтөнийг хэвтээ байдалд байлгана.

Туншил бүрт 1ммоль-с бага натри агуулагдана. 2 ба түүнээс олон туншилыг тарих үед натрийн хэмжээ нь 1 ммоль-с их болох тул натрийн хэмжээ хязгаарладаг өвчтөнд анхааралтай хэрэглэнэ.

Системийн чонон яр болон холбогч эдийн системийн бусад өвчний үед пентоксифиллиныг хэрэглэх бол эмчилгээний ашиг тус ба эрсдэлийг харьцуулан үнэлнэ.

Жирэмсэн хөхүүл эмэгтэйчүүдэд хэрэглэх  

Пентоксифиллиныг жирэмсэн үед хэрэглэхэд аюулгүй гэдэг нь нотлогдоогүй тул бэлдмэлийг хэрэглэхийг зөвлөхгүй.

Пентоксифиллин нь хөхний сүүгээр ялгардаг тул эмчилгээний явцад хүүхдийг хөхөөр хооллохгүй.

Жолоо барих болон машин механизмтай ажиллах чадварт бэлдмэлийн үзүүлэх нөлөө:

Тээврийн хэрэгсэл жолоодох болон машин механизмтай ажиллах чадварт нөлөөлөх судалгаа байхгүй ч бэлдмэл хэрэглэхэд гаж нөлөө (толгой эргэх г.м) үүсч болзошгүй тул анхаарал төвлөрөл, хариу урвал шаардагдсан техниктэй ажиллах, аюултай үйл ажиллагаа  эрхлэхдээ болгоомжлоно уу.